14.09.2026
சுவிட்சர்லாந்தின் மிகப்பெரிய சில்லறை விற்பனை நிறுவனங்களான Coop மற்றும் Migros, இணையவழியாக உணவுப் பொருட்களை விற்பனை செய்வதற்காக நவீன விநியோக மையங்களில் பெருமளவு முதலீடு செய்து வருகின்றன. இருந்தபோதிலும், சுவிஸ் மக்கள் இன்னமும் பல்பொருள் அங்காடிகளுக்கு நேரில் சென்று பொருட்களைத் தேர்ந்தெடுத்து வாங்குவதையே அதிகம் விரும்புவதாக சந்தைத் தகவல்கள் தெரிவிக்கின்றன.
2025ஆம் ஆண்டில் சுவிட்சர்லாந்தில் வாங்கப்பட்ட உணவுப் பொருட்களில் சுமார் 3% மட்டுமே இணையவழியாக வாங்கப்பட்டுள்ளன. இதற்கு மாறாக பிரிட்டனில் இணையவழி உணவுப் பொருள் கொள்வனவு 10%க்கும் அதிகமாக உள்ளது. சுவிட்சர்லாந்தின் இணையவழி உணவுப் பொருள் விற்பனைச் சந்தையில் Coop மற்றும் Migros ஆகிய இரு நிறுவனங்களும் இணைந்து சுமார் 95% சந்தைப் பங்கைக் கொண்டுள்ளன.
Migros அண்மையில் Regensdorf-இல் புதிய இணையவழி விநியோக மையத்தைத் திறந்துள்ளது. எதிர்காலத்தில் சுமார் 21,000 வகையான பொருட்களை வாடிக்கையாளர்களின் வீடுகளுக்கு அனுப்பும் வகையில் இந்த மையம் அமைக்கப்பட்டுள்ளது. ஆனால் தற்போது அதன் மொத்த செயல்திறனில் சுமார் 20% மட்டுமே பயன்படுத்தப்படுகிறது. 2027ஆம் ஆண்டுக்குள் இதனை 70% வரை அதிகரிக்க Migros திட்டமிட்டுள்ளது. Coop நிறுவனமும் Regensdorf-இல் நாளொன்றுக்கு 16,500 கொள்வனவுக் கோரிக்கைகள் வரை கையாளக்கூடிய புதிய விநியோக மையத்தைத் திட்டமிட்டுள்ளது.
சுவிட்சர்லாந்தில் இணையவழி உணவுப் பொருள் விற்பனை மெதுவாக வளர்வதற்கு பல காரணங்கள் உள்ளன. நாடு புவியியல் ரீதியாக சிறியதாக இருப்பதுடன், பல்பொருள் அங்காடிகளின் கிளைகளும் பரவலாக அமைந்துள்ளன. இதனால் பெரும்பாலான மக்கள் தங்களது வீட்டிற்கு அருகிலேயே பொருட்களை வாங்க முடிகிறது. இணையத்தில் பொருட்களைப் பதிவு செய்து அவை வீட்டிற்கு வரும் வரை காத்திருப்பதைவிட, நேரடியாக கடைக்குச் சென்று வாங்குவது பலருக்கு எளிதானதாக உள்ளது.
அதேவேளை, சுவிட்சர்லாந்தின் கடுமையான உணவுப் பாதுகாப்பு விதிமுறைகள் பொருட்களைப் பொதியிடுவதையும் வீட்டிற்கு விநியோகிப்பதையும் சிக்கலாக்குகின்றன. உதாரணமாக, புதிய ரொட்டி போன்ற உணவுப் பொருட்களுடன் துப்புரவுப் பொருட்களை ஒரே பையில் வைக்க முடியாது. குளிர்ச்சியில் பாதுகாக்கப்பட வேண்டிய உணவுப் பொருட்களுக்கு தொடர்ச்சியான குளிர்நிலைப் பாதுகாப்பும் உறுதி செய்யப்பட வேண்டும். இதனால் வீட்டிற்கு பொருட்களை விநியோகிப்பதற்கான செலவு அதிகரிக்கிறது.
சுவிட்சர்லாந்தில் ஊழியர்களுக்கான அதிக ஊதியச் செலவும் மற்றொரு முக்கிய காரணமாகக் குறிப்பிடப்படுகிறது. விநியோக மையத்திலிருந்து வாடிக்கையாளரின் வீட்டிற்கு பொருட்களை எடுத்துச் செல்லும் இறுதிக்கட்ட செலவு மற்ற சில நாடுகளுடன் ஒப்பிடும்போது அதிகமாக உள்ளது. இந்தச் செலவின் ஒரு பகுதி வாடிக்கையாளர்களிடம் வசூலிக்கப்படுவதால், இணையவழி கொள்வனவின் கவர்ச்சி குறையக்கூடும்.
மேலும் Coop மற்றும் Migros இணையவழி அங்காடிகளில் உள்ள 99.90 சுவிஸ் பிராங்க் குறைந்தபட்ச கொள்வனவுத் தொகையும் சில வாடிக்கையாளர்களுக்கு தடையாக இருக்கலாம். இதனுடன் வீட்டிற்கு கொண்டுவந்து வழங்குவதற்கான கட்டணம் மற்றும் அதே நாளில் பொருட்களைப் பெற விரும்பினால் ஏற்படும் கூடுதல் செலவுகளும் சேர்கின்றன.
நவீன விநியோக மையங்களுக்காக பெருமளவு முதலீடுகள் செய்யப்பட்டாலும், சுவிட்சர்லாந்தில் உணவுப் பொருட்களை இணையத்தில் வாங்குவதைவிட கடைக்கு நேரில் சென்று வாங்கும் பழக்கம் இன்னமும் வலுவாகவே உள்ளது.
தகவல் மூலம்: Watson / NZZ |