வெளிநாட்டு வேலைவாய்ப்பு மோசடிகள் மற்றும் ‘டொலர் மாபியா’: பாராளுமன்றத்தில் முறையான விசாரணை நடத்த அரசு உறுதி கொழும்பு:இலங்கையில் அதிகரித்து வரும் வெளிநாட்டு வேலைவாய்ப்பு மோசடிகள், விசா ஏமாற்றுகள் மற்றும் கட்டுநாயக்க சர்வதேச விமான நிலையத்தில் இடம்பெறுவதாகக் கூறப்படும் ‘டொலர் மாபியா’ விவகாரம் தொடர்பில் பாராளுமன்றத்தில் எழுப்பப்பட்ட கேள்விகளுக்குப் பதிலளித்த பொதுப் பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால, இச்சம்பவங்கள் குறித்து முறையான விசாரணைகள் முன்னெடுக்கப்படும் எனத் தெரிவித்துள்ளார்.
பாராளுமன்ற நிலையியல் கட்டளை 27(2) இன் கீழ் சபாநாயகர் முன்னிலையில் முன்வைக்கப்பட்ட விசேட வினாவுக்குப் பதிலளிக்கும் போதே அமைச்சர் இந்த உறுதியை அளித்தார். கோடிக்கணக்கில் பண மோசடி & தற்கொலை அச்சுறுத்தல் ஐரோப்பிய மற்றும் ஏனைய வெளிநாடுகளுக்கு வேலைவாய்ப்பு, விசா அல்லது குடியகல்வு வாய்ப்புகளை வழங்கித் தருவதாகக் கூறி, பதிவுசெய்யப்பட்ட மற்றும் பதிவுசெய்யப்படாத முகவரகங்களால் அப்பாவி மக்களிடமிருந்து கோடிக்கணக்கான ரூபாய் பணம் மோசடி செய்யப்படுவதாகப் பாராளுமன்றத்தில் சுட்டிக்காட்டப்பட்டது.
இத்தகைய மோசடிகளால் பாதிக்கப்பட்ட மக்கள் பலத்த பொருளாதார நெருக்கடிக்குள்ளாவதுடன், கடுமையான உளவியல் உளைச்சலுக்கு ஆளாகி தற்கொலை முயற்சிகளிலும், உயிரிழப்புகளிலும் முடங்கும் சோகமான சூழ்நிலை உருவாகியுள்ளதாகக் கவலை தெரிவிக்கப்பட்டது.மட்டக்களப்பு மாவட்டத்தில் மட்டும் இது தொடர்பில் 20-க்கும் மேற்பட்ட நேரடி முறைப்பாடுகள் கிடைத்துள்ளதாகவும், பாதிக்கப்பட்டவர்கள் பொலிஸ், குற்றப்புலனாய்வுத் திணைக்களம் (CID), குடிவரவு திணைக்களம் மற்றும் வெளிநாட்டு வேலைவாய்ப்புப் பணியகம் (SLBFE) ஆகியவற்றுக்கு இடையே அலைக்கழிக்கப்படுவதாகவும் தெரிவிக்கப்பட்டது.
விமான நிலைய ‘டொலர் மாபியா’ குற்றச்சாட்டுவிமான நிலையத்தில் நடைபெறும் முறைகேடுகள் குறித்தும் பாராளுமன்றத்தின் கவனம் ஈர்க்கப்பட்டது:சட்டப்பூர்வ ஆவணங்கள் நிராகரிப்பு: தேவையான அனைத்து சரியான ஆவணங்களுடன் வரும் பயணிகளின் பயணங்கள் “மேலதிக சரிபார்ப்பு” என்ற பெயரில் தடுக்கப்படுகின்றன. பணம் கோரும் மாபியா: அதேபோன்ற ஆவணங்களைக் கொண்ட பிற பயணிகள் சட்டவிரோதமாக மேலதிக பணம் செலுத்திய பின்னர் பயணிக்க அனுமதிக்கப்படுவதாகக் குற்றஞ்சாட்டப்படுகிறது.நிதி இழப்பு: பணம் கொடுக்க மறுக்கும் நபர்களுக்குப் புறப்பாடு மறுக்கப்பட்டு, பாரிய நிதி இழப்புகள் ஏற்படுகின்றன.
பாராளுமன்றத்தில் முன்வைக்கப்பட்ட முக்கிய கோரிக்கைகள்பிரத்தியேக தேசிய புலனாய்வு அலகு: பாதிக்கப்பட்ட மக்கள் பல நிறுவனங்களுக்கு இடையே அலைக்கழிக்கப்படுவதைத் தடுக்க, வெளிநாட்டு வேலைவாய்ப்பு மோசடிகள் மற்றும் மனிதக் கடத்தல்களை விசாரிக்க உடனடியாக ஒரு சிறப்பு தேசிய புலனாய்வு அலகு (Special National Investigation Unit) உருவாக்கப்பட வேண்டும்.சுயாதீன விசாரணை: விமான நிலையத்திலும் குடிவரவுத் திணைக்களத்திலும் ‘டொலர் மாபியா’வாகச் தொழிற்படும் ஒழுங்கமைக்கப்பட்ட நெட்வொர்க் குறித்து பாரபட்சமற்ற விசாரணை நடத்தப்பட வேண்டும்.கடந்த 5 ஆண்டு தரவுகள்: கடந்த ஐந்து ஆண்டுகளில் பதிவான முறைப்பாடுகள், கைதுகள், தாக்கல் செய்யப்பட்ட வழக்குகள், தண்டனைகள் மற்றும் அரசாங்க அதிகாரிகளின் ஈடுபாடு குறித்த விரிவான அறிக்கையை அரசாங்கம் சமர்ப்பிக்க வேண்டும்.
அமைச்சரின் பதில்இதற்குப் பதிலளித்துப் பேசிய பொதுப் பாதுகாப்பு மற்றும் பாராளுமன்ற அலுவல்கள் அமைச்சர் ஆனந்த விஜேபால: “இந்த முறையற்ற செயற்பாடுகள் மற்றும் மாபியா குற்றச்சாட்டுகள் குறித்து முறையான மற்றும் விரிவான விசாரணைகள் முன்னெடுக்கப்படும். பொதுமக்கள் அல்லது பாராளுமன்ற உறுப்பினர்களிடம் இது தொடர்பான தகவல்கள் மற்றும் ஆதாரங்கள் இருப்பின் அவற்றை அதிகாரிகளிடம் உடனடியாக வழங்குமாறு கேட்டுக்கொள்கிறேன். பெறப்படும் அனைத்துத் தகவல்களும் தீர விசாரிக்கப்பட்டு, சட்டத்தின் முன் தகுந்த நடவடிக்கைகள் எடுக்கப்படும்.”