எந்தவொரு சந்தர்ப்பத்திலும் ஐக்கிய மக்கள் சக்தி தனது கொள்கைகளை விட்டுக் கொடுக்காது எனவும், பௌத்த மதத்தைப் பாதுகாப்பதுடன் ஏனைய அனைத்து மதங்களின் உரிமைகளுக்காகவும் தொடர்ந்து குரல் கொடுக்கும் எனவும் எதிர்க்கட்சித் தலைவர் சஜித் பிரேமதாச தெரிவித்துள்ளார்.
இரத்மலானை கொத்தலாவலபுர சிறி விஜிதாராம விகாரையில் நிர்மாணிக்கப்படவுள்ள ‘அட்டவிசி புத்த மந்திரம்’ மற்றும் தங்க வேலிகளுடன் கூடிய புனித போதிப் பிரகாரத்திற்கான அடிக்கல் நாட்டும் நிகழ்வில் கலந்துகொண்டு உரையாற்றும்போதே அவர் இவ்வாறு குறிப்பிட்டார்.
எதிர்க்கட்சித் தலைவரின் தாயாரான ஹேமா பிரேமதாசவின் 91ஆவது பிறந்தநாளை முன்னிட்டு, போதிப் பிரகார நிர்மாணத்திற்காக 14 இலட்சம் ரூபாவும், விகாரையின் ஏனைய அபிவிருத்திகளுக்காக 4 இலட்சம் ரூபாவும் இதன்போது நன்கொடையாக வழங்கி வைக்கப்பட்டன.
“அரசியல் இலாபத்திற்காக மதத்தைப் பயன்படுத்தக் கூடாது”
நிகழ்வில் உரையாற்றிய எதிர்க்கட்சித் தலைவர் சஜித் பிரேமதாச, பௌத்த மதத்தைப் பாதுகாப்பதிலும் போஷிப்பதிலும் ஆட்சியாளர்களுக்கு முதன்மைப் பொறுப்பு உள்ளது எனச் சுட்டிக்காட்டினார்.
“ஒரு நடைமுறைப் பௌத்தனாக சம்புத்த சாசனத்தைப் பாதுகாக்க எப்போதும் முன்னிற்பேன். ஆனால், தனிப்பட்ட அரசியல் நோக்கங்களை அடைவதற்காகப் பௌத்த மதத்தையோ சாசனத்தையோ பயன்படுத்துவதை முற்றாக நிராகரிக்கிறேன். நாம் விசுவாசம் கொள்ளும் மதத்தின் போதனைகளைப் பின்பற்றி வாழ்வதே உண்மையான பாதுகாப்பாகும்.”
— சஜித் பிரேமதாச (எதிர்க்கட்சித் தலைவர்)
அரசியலமைப்பில் பௌத்த மதத்திற்கு முதலிடம் வழங்கப்பட்டுள்ள அதேவேளை, நாட்டில் வாழும் ஏனைய இன, மத சமூகங்களின் உரிமைகளும் பாதுகாக்கப்பட வேண்டும் என்பதில் தெளிவான சட்டச் சட்டகம் உள்ளது என்றும் அவர் விளக்கினார்.
“அனைத்து சமூகங்களின் உரிமைக்காகவும் குரல் கொடுத்துள்ளோம்”
ஐக்கிய மக்கள் சக்தி என்றும் சிறுபான்மை சமூகங்களின் நியாயமான பிரச்சினைகளுக்கு முன்னின்று குரல் கொடுத்துள்ளதாகத் தெரிவித்த எதிர்க்கட்சித் தலைவர், பின்வரும் சம்பவங்களை நினைவுகூர்ந்தார்:
கொரோனா காலம்: முஸ்லிம் சமூகத்தின் ஜனாஸா நல்லடக்க உரிமைக்காகக் குரல் கொடுத்தமை.
கலாச்சாரச் சர்ச்சைகள்: கல்முனை வைத்தியசாலை தாதியர்களின் சீருடைப் பிரச்சினையில் பாராளுமன்றத்தில் முறையிட்டமை.
அனோஜனின் விடுதலை: அனோஜனின் விடுதலைக்காகவும் பாதிக்கப்பட்ட மக்களுக்காகவும் முன்னெடுக்கப்பட்ட துரித நடவடிக்கைகள்.
உயிர்த்த ஞாயிறு தாக்குதல்: பாதிக்கப்பட்ட மக்களுக்கு இன, மத வேறுபாடின்றி நீதியைப் பெற்றுத்தரக் குரல் கொடுத்தமை.
அத்துடன், பிக்குகள் தொடர்பான விவகாரங்களில் சாதாரண நபர்கள் தீர்மானம் எடுக்க முடியாது எனவும், காவி உடைக்கு அவமதிப்பு ஏற்படும்போதெல்லாம் அதற்கு எதிராகத் தமது கட்சி குரல் கொடுத்துள்ளதாகவும் அவர் குறிப்பிட்டார்.
ரணசிங்க பிரேமதாசவின் சேவைகள் நினைவூட்டல்
முன்னாள் ஜனாதிபதி ரணசிங்க பிரேமதாசவின் ஆட்சிக்காலத்தில் புத்தசாசன அமைச்சு மற்றும் புத்தசாசன நிதியம் உருவாக்கப்பட்டு 14,000க்கும் மேற்பட்ட விகாரைகளும், ஆயிரக்கணக்கான அறநெறிப் பாடசாலைகளும் பலப்படுத்தப்பட்டதை அவர் சுட்டிக்காட்டினார்.
அதேபோன்று ஏனைய மதங்களுக்கும் தனித்தனியான இராஜாங்க அமைச்சுகள் ஸ்தாபிக்கப்பட்டு மத நல்லிணக்கம் பேணப்பட்டதை நினைவு கூர்ந்த சஜித் பிரேமதாச, தற்போதும் அதேபோன்று புத்தசாசன அமைச்சரவை அமைச்சுடன் ஏனைய மதங்களுக்கும் தனித்தனியான இராஜாங்க அமைச்சுகளை உருவாக்கி மதவாதத்தையும் இனவாதத்தையும் இல்லாதொழிக்க அரசு நடவடிக்கை எடுக்க வேண்டும் என வலியுறுத்தினார்.