Switzerland-இல் வாகன ஓட்டிகள் தற்போது எரிபொருளுக்காக கூடுதல் பணம் செலவிட வேண்டிய நிலை ஏற்பட்டுள்ளது. தொடர்ச்சியான வறட்சியால் ரைன் (Rhine) நதியின் நீர்மட்டம் குறைந்திருப்பதே தற்போதைய விலை உயர்வுக்கு முக்கிய காரணமாகக் கூறப்படுகிறது.
Switzerland-க்கு தேவையான கணிசமான அளவு எரிபொருள், வடக்குக் கடல் துறைமுகங்களிலிருந்து ரைன் நதி வழியாக Basel பகுதிக்கு கப்பல்களில் கொண்டுவரப்படுகிறது. ஆனால் நீர்மட்டம் குறைந்ததால் எரிபொருள் ஏற்றிவரும் கப்பல்கள் வழக்கமான அளவு சரக்குகளை எடுத்துச் செல்ல முடியாத நிலை ஏற்பட்டுள்ளது.
இதனால் போக்குவரத்துச் செலவுகள் அதிகரித்து, அதன் தாக்கம் எரிபொருள் நிலையங்களின் விலைகளிலும் பிரதிபலிக்கிறது.
தற்போதைய சராசரி விலைகள்:
- Unleaded 95 பெட்ரோல்: லிட்டருக்கு CHF 2.02
- டீசல்: லிட்டருக்கு CHF 2.27
Touring Club Suisse (TCS) தகவலின்படி, தற்போதைய எரிபொருள் விலைகள் “கிட்டத்தட்ட முன்னெப்போதும் இல்லாத அளவுக்கு உயர்ந்துள்ளன.”
கடந்த ஜூன் மாதத்தில் Unleaded 95 பெட்ரோல் லிட்டருக்கு சுமார் CHF 1.88 ஆகவும், டீசல் CHF 2.10 ஆகவும் குறைந்திருந்தது. ஆனால் அந்த விலை நிவாரணம் நீண்ட காலம் நீடிக்கவில்லை.