சவுதி அரேபியாவில் மரண தண்டனையை எதிர்கொண்டு வரும் இலங்கைப் பிரஜையான சிவராசா அனோஜன் தொடர்பான சட்ட, இராஜதந்திர நடவடிக்கைகள் மற்றும் அவவரது பாதுகாப்பு குறித்து நாடாளுமன்றத்தில் இன்று (07.10.2026) மட்டக்களப்பு மாவட்ட நாடாளுமன்ற உறுப்பினர் சாணக்கியன் இராசமாணிக்கம் பல அவசரக் கேள்விகளை எழுப்பியுள்ளார்.
சிவராசா அனோஜனின் தற்போதைய உடல்நிலை, சிறைச்சாலை மோதல் தொடர்பான முரண்பட்ட தகவல்கள், சட்ட மேல்முறையீட்டு நிலவரம் மற்றும் நாடாளுமன்றப் பிரதிநிதிகள் குழுவின் பயணம் குறித்து அரசாங்கம் தெளிவான விளக்கமளிக்க வேண்டும் என அவர் கேட்டுக்கொண்டார்.
சிறைச்சாலைத் தாக்குதல்: முரண்படும் தகவல்கள்
சிவராசா அனோஜன் வேறு சிறைச்சாலைக்கு மாற்றப்பட்ட பின்னர், அங்குள்ள மற்றொரு கைதியால் கத்தியால் தாக்கப்பட்டதாகவும், தலையில் பலத்த காயங்களுடன் உயிருக்கு அச்சுறுத்தல் ஏற்பட்டுள்ளதாகவும் அவரது குடும்பத்தினருக்குத் தகவல் கிடைத்துள்ளதாக சாணக்கியன் இராசமாணிக்கம் சுட்டிக்காட்டினார்.
இருப்பினும், இதற்கு மறுப்புத் தெரிவிக்கும் வகையில் விளக்கமளித்த வெளிவிவகார அமைச்சர்:
சிறைச்சாலை அதிகாரிகள் கூற்று: இரு கைதிகளுக்கிடையே ஏற்பட்ட வாய்த்தகராறு மோதலாக மாறியதில், மற்றைய கைதியின் நகங்களால் முகத்திலும் உடலிலும் கீறல் காயங்களே ஏற்பட்டுள்ளன. கத்தி போன்ற கூர்மையான ஆயுதங்கள் பயன்படுத்தப்படவில்லை.
தூதரகத்தின் நேரடிச் சந்திப்பு மறுப்பு: 2026 ஒக்டோபர் 06 அன்று இலங்கைத் தூதரக அதிகாரிகள் தம்மாம் சிறைச்சாலைக்குச் சென்று அதிகாரிகளையும் வைத்தியரையும் சந்தித்தபோதிலும், அனோஜனை நேரடியாகச் சந்திக்க அனுமதி மறுக்கப்பட்டுள்ளது. இதனால் வைத்தியரின் அறிக்கையின் அடிப்படையிலேயே தகவல்கள் பெறப்பட்டுள்ளன.
தற்போதைய நிலை: அனோஜன் வேறு சிறைக்கூடத்திற்கு மாற்றப்பட்டுள்ளதுடன், அவருக்குத் தற்போது உடனடி உயிருக்கு அச்சுறுத்தல் எதுவும் இல்லை என சவுதி தரப்பு உறுதியளித்துள்ளது.
சட்ட நடவடிக்கைகள் & முக்கிய காலக்கெடு
அனோஜனுக்கான சட்டப் போராட்டங்கள் தீவிரமாக நடைபெற்று வருவதாகத் தெரிவித்த வெளிவிவகார அமைச்சர், பின்வரும் முக்கிய விவரங்களைப் பகிர்ந்துகொண்டார்:
சவுதி அரசின் மேல்முறையீடு: சவுதி அரசுத் தரப்பு கடந்த செப்டெம்பர் 23 அன்று தனது மேல்முறையீட்டைத் தாக்கல் செய்துள்ளது.
உச்சநீதிமன்ற மேல்முறையீட்டு எல்லை: சவுதி அரேபிய உச்சநீதிமன்றத்தில் மேல்முறையீடு செய்வதற்கான இறுதி நாள் 2026 ஒக்டோபர் 17 ஆகும். எனினும், ஒக்டோபர் 14ஆம் திகதிக்கு முன்னதாகவே மேல்முறையீட்டைத் தாக்கல் செய்ய நடவடிக்கை எடுக்கப்பட்டு வருகிறது.
இலங்கைக் குழுவின் விஜயம்: ஜனாதிபதி சட்டத்தரணிகளான பைசல் முஸ்தபா மற்றும் உபுல் குமரப்பெரும உள்ளிட்ட சட்ட நிபுணர்கள் குழுவொன்று சவுதி சட்ட ஆலோசகர்களுடன் இணைந்து மேல்முறையீட்டு ஆவணங்களைத் தயாரிக்கும் பணியில் ஈடுபட்டுள்ளது.
நாடாளுமன்றக் குழு மற்றும் கருணை மனு
பிரதி சபாநாயகர் தலைமையில் சவுதி அரேபியா செல்லவுள்ள நாடாளுமன்ற சிறப்பு பிரதிநிதிகள் குழுவின் பயணம் தொடர்பில் கேட்கப்பட்ட கேள்விக்கு பதிலளித்த அமைச்சர், தற்போதைய நீதிமன்ற மேல்முறையீட்டு நடவடிக்கைகள் நிறைவடைந்த பின்னரே அக்குழுவின் பயணம் குறித்து இறுதி முடிவு எடுக்கப்படும் எனக் கூறினார்.
அத்துடன், நீதிமன்றச் செயல்முறைகள் நிறைவடைந்த பின்னரே அடுத்தகட்ட இராஜதந்திர முயற்சிகள் மற்றும் ஜனாதிபதியின் கருணை மனு தொடர்பான நடவடிக்கைகள் முன்னெடுக்கப்படும் என்றும் தெரிவிக்கப்பட்டது.
“அரசியல் நோக்கமில்லை” – சாணக்கியன் விளக்கம்
இந்த விவகாரத்தை தாம் அரசியல் லாபத்திற்காகப் பயன்படுத்தவில்லை எனக் குறிப்பிட்ட சாணக்கியன் இராசமாணிக்கம், “சவுதி அரசாங்கத்தை விமர்சிப்பதோ அல்லது அதன் மீது குற்றஞ்சாட்டுவதோ எனது நோக்கமல்ல. குடும்பத்தினருக்குக் கிடைக்கும் தகவல்களுக்கும் அதிகாரிகளின் அறிக்கைகளுக்கும் இடையே உள்ள முரண்பாடுகளைத் தெளிவுபடுத்தி, அனோஜனின் பாதுகாப்பை உறுதி செய்யவே இக்க கேள்விகளை எழுப்புகிறேன்” எனத் தெரிவித்தார்.
பொறுப்புடன் மற்றும் மனிதாபிமான அடிப்படையில் இந்த விவகாரத்தைக் கையாளுமாறு கேட்டுக்கொண்ட வெளிவிவகார அமைச்சர், வழக்கின் அனைத்து உத்தியோகபூர்வ ஆவணங்களும் கிடைத்தவுடன் நாடாளுமன்றத்தில் சமர்ப்பிக்கப்படும் என உறுதியளித்தார்.