Solothurn Canton-ன் Balsthal பகுதியில் மலையேற்றத்தில் ஈடுபட்டிருந்த 35 வயது நபர் ஒருவர் விஷப்பாம்பு கடித்ததால் Rega ஹெலிகாப்டர் மூலம் மருத்துவமனைக்கு கொண்டு செல்லப்பட்டார். அவரைக் கடித்தது Aspisviper வகை பாம்பாக இருக்கலாம் எனக் கருதப்படுகிறது.
Switzerland-ல் இயற்கையாக வாழும் முக்கியமான இரண்டு விஷப்பாம்பு வகைகள் Aspisviper மற்றும் Kreuzotter. இவை Mittelland பகுதியில் மிகவும் அரிதாகவே காணப்படுகின்றன. ஆனால் Jura மலைப்பகுதிகளின் வெயில் படும் சரிவுகளிலும் Alps பகுதிகளிலும் இவற்றைக் காணும் வாய்ப்பு அதிகம்.
Balsthal சம்பவத்தில் பாம்பு கடித்த பின்னர் அந்த நபரின் கை விரைவாக வீங்கியுள்ளது. Bern-ன் Inselspital மருத்துவமனையில் அவருக்கு பொருத்தமான விஷமுறிவு மருந்து (Antivenom) வழங்கப்பட்டது.
Tox Info தகவலின்படி, Switzerland-ல் மருத்துவமனைக்கு வரும் பாம்புக்கடி சம்பவங்களில் சுமார் ஐந்தில் ஒருவருக்கே Antivenom தேவைப்படுகிறது. தற்போதைய மருத்துவ வசதிகளால் பாம்புக்கடிக்கு சிறப்பாகச் சிகிச்சை அளிக்க முடிகிறது.
பாம்பைக் கண்டால் என்ன செய்ய வேண்டும்?
அமைதியாக இருந்து பாம்பிலிருந்து மெதுவாக விலகுங்கள். பாம்பைப் பிடிக்கவோ, தொடவோ, புகைப்படம் எடுப்பதற்காக அருகில் செல்லவோ வேண்டாம். கற்கள், மரக்கட்டைகள் மற்றும் சுவர் இடுக்குகளில் கைகளை வைக்கும் போதும் கவனம் தேவை. மலையேற்றம் மற்றும் காட்டுப் பயணங்களின்போது பாதுகாப்பான காலணிகளை அணிவது நல்லது.
பாம்பு கடித்தால் என்ன செய்ய வேண்டும்?
உடனடியாக மருத்துவ உதவியை நாடுங்கள். கடிபட்ட இடத்தை வெட்டுவது, விஷத்தை வாயால் உறிஞ்சுவது அல்லது இறுக்கமாகக் கட்டுவது போன்றவற்றைச் செய்ய வேண்டாம். Antivenom மருந்தை மருத்துவர்கள் மட்டுமே வழங்க வேண்டும்.