நீர்கொழும்பு: நீர்கொழும்பு சிறைச்சாலையில் அண்மையில் இடம்பெற்ற வன்முறை கலவரத்தால் ரூ.10 கோடிக்கும் அதிகமான அரசுச் சொத்துக்கள் சேதமடைந்துள்ளதாக சிறைச்சாலை வட்டாரங்கள் தெரிவிக்கின்றன. இதேவேளை, கலவரத்தில் படுகாயமடைந்து கொழும்பு தேசிய வைத்தியசாலையில் சிகிச்சை பெற்று வந்த மேலும் ஒரு சிறைச்சாலை அதிகாரி உயிரிழந்ததைத் தொடர்ந்து மொத்த உயிரிழப்பு 28 ஆக உயர்ந்துள்ளதாக சிறைச்சாலை ஊடகப் பேச்சாளர் உறுதிப்படுத்தியுள்ளார்.
உயிரிழந்தவர்களில் எட்டு பேர் சிறைச்சாலை அதிகாரிகளும், 20 பேர் கைதிகளும் அடங்குகின்றனர். உயிரிழந்த அதிகாரி, கலவரத்தைக் கட்டுப்படுத்த முயன்றபோது தாக்குதலுக்குள்ளாகி தீவிர சிகிச்சைப் பிரிவில் சிகிச்சை பெற்று வந்ததாக மருத்துவமனை வட்டாரங்கள் தெரிவித்தன.
கலவரத்தின் போது சிறைச்சாலையின் தொலைக்காட்சி ஒளிபரப்பு அமைப்பு, மருந்துக் களஞ்சியம், உடல் ஸ்கேனர் (Body Scanner), கண்காணிப்பு கமெரா (CCTV) அமைப்பு, அலுவலகங்கள் மற்றும் பிரதான களஞ்சியம் உள்ளிட்ட பல கட்டமைப்புகள் கடுமையாக சேதமடைந்துள்ளன. ஆரம்ப மதிப்பீட்டின்படி, ஏற்பட்ட சொத்து சேதம் ரூ.10 கோடியை மீறியுள்ளதாக சிறைச்சாலை உயரதிகாரி ஒருவர் தெரிவித்துள்ளார்.
பாதுகாப்பு நடவடிக்கையாக, அமைப்புசார்ந்த குற்றச்செயல்களுடன் தொடர்புடையதாகக் கூறப்படும் சிலர் உட்பட 13 ஆபத்தான கைதிகளும், மேலும் 55 கைதிகளும் கடந்த 6 ஆம் திகதி இரவு பூஸ்ஸ உயர் பாதுகாப்பு சிறைச்சாலைக்கு மாற்றப்பட்டனர்.
இதனுடன், நீர்கொழும்பு சிறைச்சாலையில் தங்க வைக்கப்பட்டிருந்த சுமார் 500 கைதிகளை காலியாக உள்ள காலி மகா மோதர வைத்தியசாலை வளாகத்திற்கு தற்காலிகமாக மாற்றுவது தொடர்பிலும் அதிகாரிகள் திட்டமிட்டு வருவதாக சிறைச்சாலை வட்டாரங்கள் தெரிவிக்கின்றன.
சிறைச்சாலையில் இருந்த மொத்தம் 1,033 கைதிகள் நாட்டின் பல்வேறு சிறைச்சாலைகளுக்கு மாற்றப்பட்டதாகவும், அவர்களில் அங்குனுகொலபெலஸ்ஸ சிறைச்சாலைக்கு மாற்றப்பட்ட ஒருவர் மற்றும் பூஸ்ஸ சிறைச்சாலைக்கு மாற்றப்பட்ட மற்றொருவர் பின்னர் உயிரிழந்ததாகவும் தெரிவிக்கப்படுகிறது. பூஸ்ஸ சிறைச்சாலைக்கு மாற்றப்பட்ட கைதி திடீர் உடல்நலக் குறைவால் கராப்பிட்டிய போதனா வைத்தியசாலையில் அனுமதிக்கப்பட்ட பின்னர் உயிரிழந்ததாக அதிகாரிகள் தெரிவித்துள்ளனர்.
மேலும், கலவரத்துக்கு தலைமை தாங்கியதாக சந்தேகிக்கப்படும் “கட்டுவெல்லகம சுரேஷ்” என்ற கைதி உள்ளிட்ட சிலர் பூஸ்ஸ உயர் பாதுகாப்பு சிறைச்சாலைக்கு மாற்றப்பட்டுள்ளதாகவும், சம்பவம் தொடர்பாக சிறைச்சாலை திணைக்களமும் பொலிஸாரும் இணைந்து பல்வேறு கோணங்களில் விசாரணைகளை முன்னெடுத்து வருவதாகவும் தெரிவிக்கப்பட்டுள்ளது.
இந்த வன்முறைச் சம்பவம் தொடர்பான மேலதிக விசாரணைகள் தொடர்ந்தும் முன்னெடுக்கப்பட்டு வருகின்றன.