பாதுகாப்பாகத் தரையிறங்கின; வெடிபொருட்கள் கண்டுபிடிக்கப்படவில்லை
ஐரோப்பாவில் செவ்வாய்க்கிழமை பல பயணிகள் விமானங்களுக்கு வெடிகுண்டு மிரட்டல்கள் விடுக்கப்பட்டதைத் தொடர்ந்து, விமான நிலையங்களில் அவசரப் பாதுகாப்பு நடவடிக்கைகள் மேற்கொள்ளப்பட்டன. அனைத்து விமானங்களும் பாதுகாப்பாகத் தரையிறங்கியதாகவும், சோதனைகளில் வெடிபொருட்கள் கண்டுபிடிக்கப்படவில்லை என்றும் அதிகாரிகள் தெரிவித்துள்ளனர்.
வார்சோ நோக்கிச் சென்ற இரு விமானங்களுக்கு மிரட்டல்
Copenhagen நகரிலிருந்து போலந்தின் Warsaw நகருக்குச் சென்ற SAS நிறுவனத்தின் SK751 விமானம், Chopin விமான நிலையத்தில் வழமையாகத் தரையிறங்கியது. பயணிகள் இறக்கப்பட்டு விமானம் சோதனையிடப்பட்டபோது, ஒரு ஓடுபாதை தற்காலிகமாக மூடப்பட்டது. வெடிபொருட்கள் எதுவும் கண்டுபிடிக்கப்படவில்லை.
London Heathrowவிலிருந்து Warsaw Chopin நோக்கிச் சென்ற LOT விமானம், மிரட்டலைத் தொடர்ந்து Warsaw Modlin விமான நிலையத்திற்குத் திருப்பிவிடப்பட்டது. விமானம் பாதுகாப்பாகத் தரையிறங்கிய பின்னர் பயணிகள் வெளியேற்றப்பட்டு சோதனைகள் நடத்தப்பட்டன.
இதனால் தற்காலிகமாக மூடப்பட்ட Modlin விமான நிலையம், சந்தேகத்திற்குரிய பொருட்கள் எதுவும் கண்டுபிடிக்கப்படாததைத் தொடர்ந்து மீண்டும் வழமையாக இயங்கத் தொடங்கியது.
ஸ்பெயின், பல்கேரியாவிலும் பாதுகாப்புச் சோதனைகள்
Manchester நகரிலிருந்து ஸ்பெயினின் Murcia நோக்கிச் சென்ற Ryanair விமானத்திற்கும் வெடிகுண்டு எச்சரிக்கை விடுக்கப்பட்டது. விமானம் பாதுகாப்பாகத் தரையிறங்கியதையடுத்து, Guardia Civil பாதுகாப்புப் படையினர் சோதனைகளை மேற்கொண்டனர். பின்னர் அவசரநிலை நடைமுறை முடிவுக்குக் கொண்டுவரப்பட்டது.
இத்தாலியின் Bergamoவிலிருந்து பல்கேரியாவின் Sofiaவுக்கு வந்த Wizz Air விமானமும், காலை 9.10 மணிக்குத் தரையிறங்கிய பின்னர் சோதனையிடப்பட்டதாக அந்நாட்டு உள்துறை அமைச்சு தெரிவித்துள்ளது.
இதற்கு முந்தைய திங்கட்கிழமை, London Luton–Sofia Wizz Air விமானம் வெடிகுண்டு மிரட்டலால் Budapest நகருக்குத் திருப்பிவிடப்பட்டது. ஹங்கேரியின் Gripen போர் விமானங்கள் அதன் பாதுகாப்பான தரையிறக்கத்திற்கு உதவின.
ஞாயிற்றுக்கிழமையும் Tel Aviv–Vienna Austrian Airlines விமானம் இதேபோன்ற மிரட்டலால் பல்கேரியாவுக்குத் திருப்பிவிடப்பட்டது. அங்கும் வெடிபொருட்கள் கண்டுபிடிக்கப்படவில்லை.