நாடு முழுவதும் சேவையாற்றும் 78,710 அபிவிருத்தி உத்தியோகத்தர்களின் தீர்க்கப்படாத சேவைச் சிக்கல்கள் மற்றும் எதிர்வரும் நவம்பர் 09ஆம் திகதி முன்னெடுக்கப்படவுள்ள தொழிற்சங்க நடவடிக்கை தொடர்பில் பாராளுமன்றத்தில் காரசாரமான விவாதம் இடம்பெற்றுள்ளது.
அபிவிருத்தி உத்தியோகத்தர்களின் சம்பள முரண்பாடுகள், பதவி உயர்வுகள் மற்றும் சேவைப் பிரமாணக் குறிப்புத் திருத்தம் உள்ளிட்ட நீண்டகாலப் பிரச்சினைகள் குறித்து பாராளுமன்ற உறுப்பினர் இரா. சாணக்கியன் நிலையியற் கட்டளை 27(2) இன் கீழ் கேள்விகளை எழுப்பினார்.
“சாகும் வரை அபிவிருத்தி உத்தியோகத்தர்களாகவே இருக்க வேண்டுமா?” – சாணக்கியன் கேள்வி
பாராளுமன்றத்தில் உரையாற்றிய இரா. சாணக்கியன், அபிவிருத்தி உத்தியோகத்தர்கள் தமது முழு சேவைக் காலத்திலும் எவ்வித பதவி உயர்வுகளும் இன்றி அதே பதவியில் இருக்க வேண்டிய நிலைமை முற்றிலும் நியாயமற்றது எனத் தெரிவித்தார்.
அவர் எழுப்பிய முக்கிய கோரிக்கைகள் மற்றும் வினாக்கள்:
சம்பள உயர்வு: எம்.என்-4 (MN-4) சம்பள அளவை எம்.என்-5 வரை உயர்த்துதல் மற்றும் எம்.என்-7 இன் கீழ் பதவி உயர்வு வாய்ப்புகளை வழங்குதல்.
சேவை கட்டமைப்பு: கல்வித் தகைமைகள் மற்றும் சேவை அனுபவத்துக்கு ஏற்ப பொருத்தமான சேவை கட்டமைப்பை உருவாக்குதல்.
தேர்தல் வாக்குறுதிகள்: அரசாங்கம் ஆட்சிக்கு வருவதற்கு முன்னர் வழங்கப்பட்ட வாக்குறுதிகளில் இதுவரை நிறைவேற்றப்பட்டவை எவை?
தொழிற்சங்க நடவடிக்கை: நவம்பர் 09ஆம் திகதி திட்டமிடப்பட்டுள்ள சுகயீன விடுமுறைப் போராட்டத்திற்கு முன்னர், தொழிற்சங்கங்களுடன் நேரடியாகக் கலந்துரையாடி தீர்வுகளை வழங்க அரசாங்கம் தயாராக உள்ளதா?
இப்பிரச்சினைகளுக்கு உடனடித் தீர்வு காணாவிடில், பிரதேச செயலகங்கள் உள்ளிட்ட அரச நிறுவனங்களின் பொதுச் சேவைகள் பாதிக்கப்பட்டு பொதுமக்கள் கடுமையான அசௌகரியங்களை எதிர்கொள்ள நேரிடும் என அவர் எச்சரித்தார்.
அமைச்சர் சந்தன அபேரத்னவின் பதில் என்ன?
இதற்குப் பதிலளித்த பொதுநிர்வாகம், மாகாண சபைகள் மற்றும் உள்ளூராட்சி மன்றங்கள் அமைச்சர் சந்தன அபேரthன, நாட்டில் தற்போது 78,710 அபிவிருத்தி உத்தியோகத்தர்கள் சேவையில் ஈடுபட்டுள்ளதாகத் தெரிவித்தார். மேலும் அவர் குறிப்பிடுகையில்:
சம்பள வரம்பு: சம்பள அதிகரிப்புகள் குறித்துக் குறிப்பிட்ட அவர், எம்.என்-4, எம்.என்-5 மற்றும் எம்.என்-7 ஆகிய சேவைத் தரநிலைகளின் அடிப்படையிலேயே சம்பள அதிகரிப்புகளை வழங்க முடியும் எனவும், அனைத்து அரச ஊழியர்களின் சம்பள அதிகரிப்பு தொடர்பில் 2025, 2026 மற்றும் 2027 ஆம் ஆண்டுகளுக்கான வரவு செலவுத் திட்டங்களின் ஊடாக விசேட கவனம் செலுத்தப்பட்டுள்ளதாகவும் தெரிவித்தார்.
தொழில் வாய்ப்புகள்: அபிவிருத்தி உத்தியோகத்தர்கள் வாழ்நாள் முழுவதும் அதே பதவியில் இருக்க வேண்டும் என்ற அவசியம் இல்லை எனக் குறிப்பிட்ட அமைச்சர், பலர் ஏற்கனவே பாடசாலைகளில் ஆசிரியர்களாகச் சேவையில் இணைத்துக் கொள்ளப்பட்டுள்ளதையும், ஏனையவர்களும் ஆசிரியர் போட்டிப் பரீட்சை மற்றும் ஏனைய அரச சேவைப் பரீட்சைகள் ஊடாக உயர் பதவி நிலைகளுக்குச் செல்லக்கூடிய வாய்ப்புகள் உள்ளதாகவும் சுட்டிக்காட்டினார்.
அரச தரப்பின் அடுத்த கட்ட நடவடிக்கை
அபிவிருத்தி உத்தியோகத்தர்களால் தற்போது முன்வைக்கப்பட்டுள்ள கோரிக்கைகள் மற்றும் பிரச்சினைகள் குறித்து அவர்களுடன் நேரடியாகக் கலந்துரையாட அரசாங்கம் எதிர்பார்ப்பதாக அமைச்சர் சந்தன அபேரத்ன உறுதியளித்தார்.
எதிர்வரும் நவம்பர் 09ஆம் திகதி தொழிற்சங்க நடவடிக்கை திட்டமிடப்பட்டுள்ள நிலையில், அரசாங்கம் இவர்களது கோரிக்கைகளுக்கு எத்தகைய காலவரையறையுடன் கூடிய தீர்வுகளை வழங்கப் போகிறது என்ற எதிர்பார்ப்பு அரச ஊழியர்கள் மத்தியில் எழுந்துள்ளது.