தனது காதலியுடன் இருந்தபோது பதிவு செய்யப்பட்ட அந்தரங்கக் காணொளியை, அவரது அனுமதியின்றி Facebook ஊடாகப் பகிர்ந்ததாகக் கூறப்படும் 22 வயதுடைய பொலிஸ் கான்ஸ்டபிள் ஒருவர் அளுபோமுல்ல பொலிஸாரால் கைது செய்யப்பட்டுள்ளார்.
சந்தேகநபர் கோனாபினுவல பொலிஸ் நிலையத்தில் பணியாற்றியவர் எனத் தெரிவிக்கப்படுகிறது. அளுபோமுல்ல பகுதியைச் சேர்ந்த இளம் பெண் அளித்த முறைப்பாட்டின் அடிப்படையில், கடந்த 19ஆம் திகதி அவர் கைது செய்யப்பட்டார்.
குறித்த இருவருக்கும் சுமார் மூன்று ஆண்டுகளாகக் காதல் தொடர்பு இருந்துள்ளது. அந்தக் காலப்பகுதியில் இருவரும் ஒன்றாக இருந்தபோது பதிவு செய்யப்பட்ட காணொளியை, சந்தேகநபர் அந்தப் பெண்ணின் Facebook கணக்கைப் பயன்படுத்தி அவரது தோழி ஒருவருக்கு அனுப்பியதாக ஆரம்பகட்ட விசாரணைகளில் தெரியவந்துள்ளது.
இது தொடர்பாக இளம் பெண் பொலிஸில் முறைப்பாடு செய்ததையடுத்து, முறைப்பாட்டைத் திரும்பப் பெறாவிட்டால் காணொளியைச் சமூக ஊடகங்கள் முழுவதும் வெளியிடுவதாக சந்தேகநபர் தொலைபேசி மூலம் தொடர்ச்சியாக மிரட்டியதாகக் கூறப்படுகிறது. பின்னர் அவர் அதனை Facebook-இல் வெளியிட்டதாகவும் முறைப்பாட்டில் குறிப்பிடப்பட்டுள்ளது.
விசாரணையின்போது, இந்தச் சம்பவத்தால் பாதிக்கப்பட்ட பெண் கடுமையான அவமானத்திற்கும் அச்சத்திற்கும் உள்ளாகியிருப்பதும், அவரது பாலியல் தனியுரிமை மீறப்பட்டிருப்பதும் உறுதிப்படுத்தப்பட்டதாகப் பொலிஸார் தெரிவித்துள்ளனர்.
இதையடுத்து இலங்கை தண்டனைச் சட்டக் கோவையின் 345 மற்றும் 486 ஆகிய பிரிவுகளின் கீழ் சந்தேகநபர் கைது செய்யப்பட்டுள்ளார். காணொளி அந்தப் பெண்ணின் சம்மதத்துடன் அவரது தொலைபேசியில் பதிவு செய்யப்பட்டதாகக் கூறப்பட்டாலும், அதனைப் பகிர அல்லது சமூக ஊடகங்களில் வெளியிட அவர் சம்மதித்தாரா என்பது தனியாக விசாரிக்கப்பட்டு வருகிறது. பதிவு செய்வதற்கான சம்மதம், அதனை வெளியிடுவதற்கான சம்மதமாகக் கருதப்பட முடியாது.
அளுபோமுல்ல பொலிஸ் நிலையப் பொறுப்பதிகாரி, பொலிஸ் பரிசோதகர் சஞ்சீவ லக்மால் விஜேவீரவின் அறிவுறுத்தலின் கீழ் மேலதிக விசாரணைகள் முன்னெடுக்கப்படுகின்றன. சந்தேகநபரை பாணந்துறை நீதவான் நீதிமன்றத்தில் ஆஜர்படுத்த நடவடிக்கை எடுக்கப்பட்டுள்ளது.