சுரேஷ் சாலே தாக்கல் செய்த மனுவில் 600 பக்க மேலதிக ஆவணங்கள்
கொழும்பு: ஈஸ்டர் ஞாயிறு குண்டுத் தாக்குதல் தொடர்பான விசாரணைகளின் பின்னணியில், குற்றப் புலனாய்வுத் திணைக்களத்தின் (CID) காவலில் உள்ள முன்னாள் அரச புலனாய்வுச் சேவைத் தலைவர், ஓய்வுபெற்ற மேஜர் ஜெனரல் சுரேஷ் சாலே தாக்கல் செய்துள்ள ரிட் மனுவுக்கு ஆதாரமாக 600 பக்கங்களுக்கும் அதிகமான மேலதிக ஆவணங்கள் மற்றும் இணைப்புகள் மேன்முறையீட்டு நீதிமன்றத்தில் சமர்ப்பிக்கப்பட்டுள்ளன.
உடல்நலக் குறைவு காரணமாக தற்போது மருத்துவமனையில் சிகிச்சை பெற்று வரும் சுரேஷ் சாலே சார்பில் அவரது சட்டத்தரணிகள் இந்த ஆவணங்களை தாக்கல் செய்துள்ளனர். குறித்த மனு எதிர்வரும் ஜூலை 10 ஆம் திகதி விசாரணைக்கு எடுத்துக்கொள்ளப்படவுள்ளது.
மனுதாரர் தரப்பின் சட்டத்தரணிகள் தெரிவிப்பதாவது, முன்னாள் நீதிபதி ஜனக டி சில்வா தலைமையிலான ஜனாதிபதி விசாரணை ஆணைக்குழுவின் முன் விசாரணை அதிகாரிகளும் முக்கிய சாட்சிகளும் வழங்கிய சத்தியப்பிரமாண வாக்குமூலங்களின் பிரதிகள் இந்த ஆவணங்களில் அடங்கியுள்ளன.
இந்த ஆவணங்கள், ஈஸ்டர் தாக்குதல் தொடர்பான விசாரணைகளில் இதுவரை முழுமையாக வெளிப்படுத்தப்படாத பல விடயங்களை வெளிச்சமிட்டுக் காட்டுவதாகவும், அக்காலகட்டத்தில் சில விசாரணை அதிகாரிகள் கடமைகளை முறையாக நிறைவேற்றவில்லை என்ற வாதத்திற்கும் ஆதாரமாக இருப்பதாகவும் மனுதாரர் தரப்பு நீதிமன்றத்தில் முன்வைத்துள்ளது. எனினும், இந்தக் கூற்றுகள் தொடர்பில் நீதிமன்றம் இதுவரை எந்தத் தீர்ப்பையும் வழங்கவில்லை.
மேலும், கொழும்பு பேராயர் கர்தினால் மல்கம் ரஞ்சித் ஜனாதிபதி விசாரணை ஆணைக்குழுவின் முன் வழங்கிய சாட்சியமும் இந்த ஆவணத் தொகுப்பில் இணைக்கப்பட்டுள்ளதாக தெரிவிக்கப்படுகிறது. ஈஸ்டர் தாக்குதல் தொடர்பான விசாரணைகள் எந்த அரசியல் தலையீடும் இன்றி சுயாதீனமாக முன்னெடுக்கப்பட வேண்டும் என கர்தினால் வலியுறுத்தியிருந்ததாக மனுதாரர் தரப்பு சுட்டிக்காட்டியுள்ளது.
இந்நிலையில், இந்த வழக்கில் தலையீடு செய்து கருத்து முன்வைக்க அனுமதி கோரி பல சிவில் அமைப்புகள், தேசிய அமைப்புகள் மற்றும் பௌத்த மதகுருமார்களும் மேன்முறையீட்டு நீதிமன்றத்தில் இடைக்கால மனுக்கள் தாக்கல் செய்துள்ளனர்.
அகில இலங்கை பௌத்த மகா சம்மேளனம், குளோபல் ஸ்ரீலங்கா ஃபோரம், தேசப்பற்றுள்ள தேசிய முன்னணி உள்ளிட்ட அமைப்புகளுடன், பல்வேறு பௌத்த விகாரைகளின் தேரர்களும் வழக்கில் தலையீடு செய்ய அனுமதி கோரியுள்ளனர்.
எதிர்வரும் ஜூலை 10 ஆம் திகதி மேன்முறையீட்டு நீதிமன்றத்தில் இந்த ரிட் மனு மீண்டும் விசாரணைக்கு எடுத்துக்கொள்ளப்படும் போது, பிரதான மனுவுடன் இணைந்து தாக்கல் செய்யப்பட்டுள்ள இடைக்கால மனுக்களும் பரிசீலிக்கப்படும் என நீதிமன்ற வட்டாரங்கள் தெரிவித்துள்ளன.