கொழும்பு புற்றுநோய் தொடக்கநிலை கண்டறியும் மையம் (Cancer Early Detection Centre) அண்மையில் இடமாற்றம் செய்யப்பட்டதைத் தொடர்ந்து, அங்கு மார்பகப் புற்றுநோய் பரிசோதனைகளை மேற்கொள்வதில் சிக்கல் ஏற்பட்டுள்ளதாகத் தகவல் வெளியாகியுள்ளது.
போதிய இடவசதி இல்லாத காரணத்தினால் மம்மோகிராபி இயந்திரத்தை நிறுவ முடியாமல் இருப்பதே இதற்கு முக்கிய காரணமாகக் கூறப்படுகிறது.
நாரஹேன்பிட்டியிலுள்ள எல்விட்டிகல மாவத்தையில் கடந்த 20 ஆண்டுகளாக இயங்கி வந்த இந்த மையம், கடந்த பெப்ரவரி 9-ஆம் திகதி கொழும்பு தேசிய மருத்துவமனையின் வெளிநோயாளிப் பிரிவுக்கு (OPD) அருகிலுள்ள புதிய கட்டிடத்திற்கு மாற்றப்பட்டது.
புதிய இடத்தில் மருத்துவ சேவைகள் தொடங்கப்பட்ட போதிலும், மம்மோகிராபி இயந்திரத்தை நிறுவுவதற்குச் பொருத்தமான இடம் ஒதுக்கப்படாததால் பரிசோதனைகள் இன்னும் ஆரம்பிக்கப்படவில்லை.
பரிசோதனைக்காக சுமார் 1,200 பெண்கள் காத்திருப்போர் பட்டியலில் உள்ளனர். இயந்திரம் நிறுவப்படும் காலம் குறித்து தெளிவற்ற நிலை நீடிப்பதால், புதிய பரிசோதனைகளுக்கான முன்பதிவுகளும் தற்காலிகமாக நிறுத்தப்பட்டுள்ளன.
இது தொடர்பாக அரச கதிரியக்கத் தொழில்நுட்பவியலாளர் சங்கத்தின் தலைவர் சானக தர்மவிக்ரம கருத்துத் தெரிவிக்கையில்:
“மார்பகப் புற்றுநோயை ஆரம்பகட்டத்திலேயே கண்டறிவது சிகிச்சையை எளிதாக்குவதோடு, குணமடைவதற்கான வாய்ப்பையும் அதிகரிக்கிறது.
ஆனால் தற்போது இடப்பற்றாக்குறையால் இந்தப் பரிசோதனைகள் தடைப்பட்டுள்ளன.
தனியார் மருத்துவமனைகளில் மம்மோகிராம் பரிசோதனைக்கு ரூ.25,000-க்கும் அதிகமான தொகை வசூலிக்கப்படும் நிலையில், குறைந்த வருமானம் கொண்ட பெண்களுக்கு இந்த அரச சேவை மிகவும் அத்தியாவசியமானதாகும்.”
இந்த மையத்தின் மூலம் ஆண்டுதோறும் 100-க்கும் மேற்பட்ட மார்பகப் புற்றுநோயாளர்கள் கண்டறியப்பட்டு, உரிய சிகிச்சைக்குப் பரிந்துரைக்கப்படுகின்றன.
தேசிய ரீதியில் இவ்வாறான பிரத்தியேகப் பரிசோதனை வசதியைக் கொண்ட ஒரே அரச மையமாக இது விளங்குவதாகவும் அவர் சுட்டிக்காட்டினார்.
மம்மோகிராபி பிரிவை நிறுவுவதற்குத் தேவையான இடத்தைத் தேர்வு செய்யும் பணிகள் தேசிய புற்றுநோய் கட்டுப்பாட்டுத் திட்டத்தின் (NCCP) பணிப்பாளர் மற்றும் உரிய அதிகாரிகளால் முன்னெடுக்கப்பட்டு வருவதாகவும், இச்செயல்முறை சற்று சிக்கலானது என்பதால் காலதாமதம் ஏற்படுவதாகவும் அந்தத் திட்ட வட்டாரங்கள் தெரிவித்துள்ளன.
பாதிக்கப்பட்டுள்ள பெண்களின் நலன் கருதி, சுகாதார அமைச்சும் சம்பந்தப்பட்ட அதிகாரிகளும் இந்தப் பிரச்சினைக்கு உடனடித் தீர்வு காண வேண்டும் என சுகாதாரத் துறையினர் கோரிக்கை விடுத்துள்ளனர்.