சுவிட்சர்லாந்தில் வீடுகள், வணிக வளாகங்கள் மற்றும் வாகனங்களில் கண்காணிப்பு கமெராக்களின் பயன்பாடு வேகமாக அதிகரித்து வருகிறது. ஆனால், பல கமெராக்கள் போதிய பாதுகாப்பு இன்றி இணையத்துடன் இணைக்கப்பட்டுள்ளதால், அவற்றின் நேரடி காட்சிகள் பொதுமக்களுக்கு இணையத்தில் திறந்தவெளியாகக் கிடைப்பதாக SRF வெளியிட்ட ஆய்வு எச்சரித்துள்ளது.
சிறப்பு தேடுபொறி ஒன்றின் உதவியுடன், கடவுச்சொல் அல்லது உள்நுழைவு (Login) பாதுகாப்பு இல்லாத 75 கண்காணிப்பு கமெராக்கள் கண்டறியப்பட்டுள்ளன. அவற்றில் குடியிருப்பு கட்டிடங்களின் நுழைவாயில்கள், விளையாட்டுக் கழகங்கள் உள்ளிட்ட இடங்களின் காட்சிகள் நேரடியாக இணையத்தில் ஒளிபரப்பப்பட்டு வந்தன.
மேலும் கவலைக்கிடமான விடயம் என்னவென்றால், சில கமெராக்களை இணையம் வழியாக வெளிநபர்கள் இயக்கவும் முடிந்துள்ளது. அதாவது, கமெராவைத் திருப்புதல், பெரிதாக்கிப் பார்ப்பது (Zoom), பதிவு தொடங்குதல் அல்லது நிறுத்துதல் போன்ற செயல்களையும் யாரும் மேற்கொள்ள முடியும்.
இதனால் தனியுரிமை மட்டுமல்லாது, பாதுகாப்பு அச்சுறுத்தல்களும் உருவாகின்றன. காட்சிகளில் காணப்படும் கட்டிடங்கள் அல்லது நிறுவன அடையாளங்கள் மூலம் கமெராவின் இருப்பிடத்தை கண்டறிந்து, சொத்துகள் மற்றும் மக்களை கண்காணிக்க அல்லது குற்றச்செயல்களுக்கு திட்டமிடவும் வாய்ப்பு இருப்பதாக நிபுணர்கள் எச்சரிக்கின்றனர்.
இதுகுறித்து சுவிஸ் குற்றத்தடுப்பு அமைப்பு (SKP) தெரிவித்ததாவது, கமெரா உரிமையாளர்கள் தங்கள் வலையமைப்பை (Network) பாதுகாப்பதுடன், வலுவான கடவுச்சொற்களை பயன்படுத்தி, மென்பொருள் புதுப்பிப்புகளை (Updates) தொடர்ந்து மேற்கொள்ள வேண்டும் என்பதாகும்.
அதேபோல், தரவு பாதுகாப்பு தொடர்பான கூட்டாட்சி அலுவலகம் (EDÖB), கமெரா வாங்கும் முன் அதன் தரவு சேமிப்பு முறை, அணுகல் அனுமதிகள் மற்றும் தனியுரிமை அமைப்புகளை கவனமாக பரிசோதிக்குமாறு பொதுமக்களுக்கு அறிவுறுத்தியுள்ளது.