‘
பாராளுமன்றத்தில் இன்று நிலையியல் கட்டளை 27/2 இன் கீழ் உரையாற்றிய மட்டக்களப்பு மாவட்ட பாராளுமன்ற உறுப்பினர் சாணக்கியன் இராசமாணிக்கம், அரசாங்கத்தின் ‘அஸ்வெசும’ நலன்புரித் திட்டத்தில் நிலவும் குறைபாடுகள் மற்றும் கடற்றொழில் அமைச்சர் இராமலிங்கம் சந்திரசேகரன் மீதான பாரிய ஊழல் குற்றச்சாட்டுகளை முன்வைத்தார். இதனால் சபையில் பெரும் பதற்றம் ஏற்பட்டது.
காலாவதியான தரவுகளால் புறக்கணிக்கப்படும் ஏழைகள்
“இன்று 2.4 மில்லியன் குடும்பங்களின் வாழ்வாதாரமாக இருக்கும் ‘அஸ்வெசும’ திட்டத்திற்கு, அரசாங்கம் இன்னும் 2019 ஆம் ஆண்டின் தரவுகளையே (HIES 2019) பயன்படுத்திக் கொண்டிருக்கிறது,” எனச் சாணக்கியன் எம்பி சுட்டிக்காட்டினார்.
வறுமை உயர்வு: உலக வங்கியின் தரவுகளின்படி 11 சதவீதமாக இருந்த வறுமை வீதம் தற்போது 25 சதவீதத்தை தாண்டியுள்ளது.
மட்டக்களப்பு நிலை: மட்டக்களப்பில் 40 சதவீத மக்கள் வறுமையில் உள்ள நிலையில், 2 இலட்சம் குடும்பங்களுக்கு உதவி தேவைப்படுகிறது. ஆனால் 50,300 பேருக்கு மட்டுமே தற்போது கொடுப்பனவு வழங்கப்படுகிறது.
நிதி ஆதாரம்: இதற்காக ஒதுக்கப்பட்டுள்ள 100 பில்லியன் ரூபாய் நிதி எங்கிருந்து பெறப்பட்டது? புதிய வரிப்பணமா அல்லது ஏற்கனவே ஒதுக்கப்பட்ட நிதியா? என அவர் கேள்வி எழுப்பினார்.
2025 ஆம் ஆண்டுக்கான புதிய குடும்ப வருமான மற்றும் செலவினக் கணக்கெடுப்பு (HIES) முடிவுகள் எப்போது வெளியாகும் என்றும், அதன் பின்னரேனும் தகுதியுள்ள ஏழைகள் உள்வாங்கப்படுவார்களா என்றும் அவர் அமைச்சரிடம் விளக்கம் கோரினார்.
கடற்றொழில் அமைச்சர் மீது ‘கப்பம்’ குற்றச்சாட்டு
தனது உரையின் போது கடற்றொழில் அமைச்சர் இராமலிங்கம் சந்திரசேகரன் மீது கடுமையான குற்றச்சாட்டுகளை சாணக்கியன் முன்வைத்தார். வட மாகாணத்தில் இடம்பெறும் சட்டவிரோத மீன்பிடி நடவடிக்கைகளுக்காக அமைச்சர் ‘கப்பம்’ பெறுவதாக அவர் பகிரங்கமாகக் குற்றம் சாட்டினார்.
“அமைச்சர் இராமலிங்கம் சந்திரசேகரன் தொடர்பில் அரசாங்கம் அவதானமாக இருக்க வேண்டும். நேர்மையான அமைச்சர்கள் உள்ள இந்த சபையில் இவ்வாறான ஊழல்களை அனுமதிக்க முடியாது. அவருக்கு எதிராக விரைவில் நம்பிக்கையில்லாப் பிரேரணை கொண்டுவரப்படும்,” எனச் சாணக்கியன் எச்சரித்தார்.
சபையில் ஏற்பட்ட மோதல் மற்றும் சபாநாயகரின் எச்சரிக்கை
சாணக்கியனின் குற்றச்சாட்டைத் தொடர்ந்து சபையில் குறுக்கிட்ட அமைச்சர் சந்திரசேகரன், இக்குற்றச்சாட்டுகளைக் கடுமையாக மறுத்தார்.
“சாணக்கியன் மற்றும் சுமந்திரன் ஆகியோருக்கு எதிராக நான் சபையில் குரல் கொடுப்பதால், காழ்ப்புணர்ச்சி காரணமாக என் மீது போலிக் குற்றச்சாட்டுகளைச் சுமத்துகிறார்கள். ஆதாரங்கள் இருந்தால் சி.ஐ.டி-யில் (CID) முறையிடுங்கள், நீதிமன்றம் தீர்மானிக்கட்டும். தயவுசெய்து உங்கள் கருத்தை மீளப்பெறுங்கள்,” என அமைச்சர் ஆவேசமாகத் தெரிவித்தார்.
இதன்போது, உரையைத் தொடர அனுமதிக்குமாறு சாணக்கியன் கோரியபோது, சபாநாயகர் தலையிட்டார். சபைக்கு இடையூறு விளைவித்தால் சபையிலிருந்து வெளியேற்ற நேரிடும் எனச் சாணக்கியனை சபாநாயகர் எச்சரித்தார்.
“நிலையியல் கட்டளைக்கு அமைவாக அமரச் சொன்னால் நான் அமருகின்றேன். ஆனால், அமைச்சரின் ஊழலுக்கு எதிரான நம்பிக்கையில்லாப் பிரேரணை உறுதியாகக் கொண்டுவரப்படும்,” எனத் தெரிவித்து சாணக்கியன் தனது உரையை நிறைவு செய்தார்.